წლევანდელ Harbin Fashion Week-ზე  მსოფლიოს 20 ზე მეტი ევროპისა და აზიის ქვეყნების  დიზაინერების კოლექციები იყო წარმოდგენილი. საქართველოს მოდის კვირეულის პატრონაჟით, ჰარბინის  პოდიუმზე  კოლექციები წარადგინა   ორმა ქართულმა ბრენდმა – “თინათინ მაღალაშვილი” და “ხარჩი”.

თინათინ მაღალაშვილი, ღონისძიებაში უკვე მეორედ მონაწილეობს. დიზაინერის თქმით, ჰარბინი მისთვის განსაკუთრებულად თბილ და შთამაგონებელ გარემოს ქმნის, სადაც თითოეული დეტალი გათვლილია დიზაინერების კომფორტსა და შემოქმედებით პროცესზე.

წელს, თინათინის საღამოს კაბების კოლექცია სახელწოდებით “Dreams come true”  დატვირთული იყო ყვავილების თემატიკით, ხელით შექმნილი ქსოვილები და დეკორი უნიკალურს ხდის მის თითოეულ ნამუშევარს. 

“5 წლის ვიყავი, როდესაც პირველად ჩავხატე ესკიზი, მას შემდეგ სულ ყველაფრისგან ყვავილებს ვჭრიდი და ვკერავდი პატარა კაბებს, ალბათ მაშინ უკვე ვიცოდი, დიდი რომ გავიზრდებოდი, დიდი გოგონებისთვის შევკერავდი დიდ ყვავილებიან კაბებს, ასეც მოხდა, როცა ძალიან გინდა, ოცნებები ხდება…” – თინათინ მაღალაშვილი.

“ხარჩი”-ს დებიუტმა ჰარბინში ფართო პროფესიული გამოხმაურება გამოიწვია, წარმოდგენილმა კოლექციამ „Unspeakable“ კი, დამსწრე საზოგადოებას ძლიერი კონცეპტუალური და ემოციური გამოცდილება შესთავაზა.

კოლექცია წარმოდგენილი იყო როგორც ერთიანი, დრამატურგიულად გააზრებული ნარატივი, რომელმაც პოდიუმი თეატრალურ სივრცედ გარდაქმნა. „Unspeakable“ ეძღვნება იმ შინაგან მდგომარეობებსა და განცდებს, რომლებიც სიტყვიერ ფორმას არ ექვემდებარება და ტანსაცმლის ენით გადმოიცემა. KHARCHI-სთვის მოდა არ არის დეკორატიული ელემენტი, არამედ იდეის, ემოციისა და ფილოსოფიის გადმოცემის საშუალება.

Harbin Fashion Week 2026 ჩატარდა თემით — „ყინული და თოვლი მოდაში, სტილი ებმის მსოფლიოს“ აღსანიშნავია, რომ საქართველოს მოდის კვირეულის პატრონაჟით, ყოველი წლის იანვარში, საქართველოს სახელით დიზაინერები წარადგენენ საკუთარ კოლექციებს. ეს მნიშვნელოვანი თანამშრომლობა ხელს შეუწყობს ქართული ბრენდების განვითარებასა და საერთაშორისო პლატფორმებზე ცნობადობისა და  ავტორიტეტის გაზრდას.

The post Harbin Fashion Week appeared first on City Magazine.

მე და ჩემს დას ხატვის ნიჭი რომ არ გვქონოდა, ის უფრო იქნებოდა გასაკვირი, რადგან ჩვენ ირგვლივ ყველა ხატავდა. ბაბუაჩემი, დედაჩემის მამა, მიხეილ ტუჩაშვილი, სამხატვრო აკადემიაში ხეზე კვეთისა და ლითონის ფიგურების ჩამოსხმის ოსტატი იყო.  ის, რომ აკადემიას ეს ფაკულტეტი ჰქონდა, მეტწილად მისი დამსახურებაცაა. მერე დედაჩემმა, ეკატერინე  ტუჩაშვილმა დაუკავშირა ცხოვრება სამხატვრო აკადემიას და იმ 36 წლიდან, რომელიც იცოცხლა, ყველაზე მეტი დრო ტანსაცმლისა და ქსოვილის დიზაინის შექმნას მიუძღვნა.

ბევრი გეგმა ჰქონდა, რომლისკენაც ნაბიჯ – ნაბიჯ მიდიოდა. მაშინ, იმ გაჭირვებულ 90-იანებში, რამდენადაც შეძლო, მოახერხა გამხდარიყო მოდელიერთა სახლის კონსტრუქტორ-დიზაინერი. გადადგა დიდი ნაბიჯი მისი ოცნების შესასრულებლად – შეექმნა  თავისი პატარა ატელიე-სახელოსნო.

დედა რომ გარდაცვალა, მე და ჩემი და პატარები ვიყავით. ჩვენს მოგონებებში კი დიდი დოზით შემორჩა მასთან ერთად სამსახურში გატარებული დრო და ჩვენთვის ეს საქმე, რაღაცნაირად, დედის მონატრებისგან გაქცევის საშუალება გახდა.

რაც თავი გვახსოვს, ნემსი ძაფი და ძველებური ხელის მანქანა ჩვენი განუყოფელი ნაწილი იყო. მერე, როცა უფრო წამოვიზარდეთ, ჩვენი მეგობრების მორთვა-მოკაზმვაზე გადავედით. ისინიც ჩვენთვის  არც საქებარ სიტყვებს იშურებდნენ და არც „დავალებებს“.

გურანდა: ,,სამოსი კიდევ ჰო, მაგრამ წელის ჩანთის შეკერვა განსაკუთრებით მერთულა.  „თხოვნას“ უარი ვერ ვუთხარი და ორი ღამე  ვშლიდი და ვაწყობდი.  იქამდე ვიმუშავე, სანამ სასურველ შედეგამდე არ მივედი. უცებ აღმოვაჩინე, რომ ამ სირთულემ  უცნაური ძალა შემმატა, საკუთარი საქმე მაპოვნინა. მომწონდა ტყავთან და მეტალის დეტალებთან მუშაობა და როცა ჩემ მიერ შექმნილ პირველივე ჩანთაში ავანსი გადამიხადეს, მივხვდი, რომ სწორ გზას დავადექი. რომ შემეძლო ჩემი და დედას ოცნებები გამეერთიანებინა და გვქონოდა საერთო ოცნება – პატარა სახელოსნო, სადაც ჩემი ფერადი მოგონებებით შევქმნიდი ფერად ნივთებს.

ადვილი არ ყოფილა. ყველა სირთულესთან გამკლავებას დამოუკიდებლად ვცდილობდი. ვშრომობდი. სულ ვშრომობდი და თითოეული ადამიანისგან, ვინც გზად მეკვეთებოდა, ვსწავლობდი რაღაც ახალს. ჩემი სახელოსნო ბრენდად შედგა. ოცნება ახდა თუმცა, ამ ახდენილი ოცნების უკან უამრავი ტექნიკური საჭიროება და შრომა იდგა.

თეო: პროფესიით იურისტი ვარ. უამრავი პროფესია გამოვიცვალე, თუმცა ფესვებს ვერ გაექცევი და უკვე 7 წელია, რაც პროფესიად ვაქციე ბავშვობის ჰობი. ვასწავლი ერთ-ერთ აკადემიაში კონსტრუირება-მოდელირებას და ასევე, მაქვს ჩემი ტანსაცმლის ხაზი. ქსოვილთან მუშაობა ჩემთვის სხვა განზომილებაა. ვინც მიცნობს, იცის, ამ დროს დაღლას ვერ ვგრძნობ.  ერთად ხშირად ვმუშაობთ და ერთხელ, როცა ერთმანეთისთვის გულის გადასაშლელად მოვიცალეთ, აღმოვაჩინეთ, რომ გვაქვს ერთი კითხვა – ხომ არ იქნებოდა დედას ოცნება ჩვენი  ერთად მუშაობა?!

გურანდა: ახლა უკვე ერთი მიზანი გვაქვს, რასაც  ჩვენი მსგავსი ხედვა აიოლებს. ის, რასაც ვაკეთებთ, მე ჩანთებს და ის – ტანსაცმელს, თითქოს ერთ  ჰარმონიას ქმნის. სახელიც ასე შევარჩიეთ –  გავაერთიანეთ დედას გვართან ჩვენი დაბადების რიცხვები Tuchelle 26.

ჩვენს ამბავს სხვებისგან ბევრი არაფერი გამოარჩევს. გარდა იმისა, რომ გვაქვს ისტორია, მიზანი და ხასიათი. ხასიათი, რომელიც თითოეულ ნამუშევარში კარგად იგრძნობა და მხოლოდ ერთისთვის, განსაკუთრებული სიყვარულით იქმნება.

ფოტო: იკა პირველი

მაკიაჟი: ანა სიჭინავა

The post Tuchelle 26 – რეალობად ქცეული იდეა appeared first on City Magazine.

ამ სფეროში სოფო საკმაოდ დიდი ხანია. საქმეს, როგორც ამბობენ, ორივე მხრიდან კარგად იცნობს. დიზაინი და სტილი მთელი მისი ცხოვრებაა. მარკეტინგი – პროფესია და სამსახურიც. “სტუდიოლაინის” წარმატება სწორედ ამ ორმა ფაქტორმა განაპირობა.

ადგილობრივი პროდუქცია და ქართველი დიზაინერების ერთგვარი მხარდაჭერა ჩვენთან უკვე საკმაოდ დამკვიდრებული კულტურაა და მე ეს ძალიან მომწონს. თუმცა, ძალიან ხშირად გამიგია, რომ ხარისხი ფასის არაადეკვატურია. ჩემი მთავარი სურვილი და მიზანი მაღალი ხარისხის ქსოვილებსა და მასალებზე მუშაობა იყო. ეს იაფი არ არის, მაგრამ ამის გარეშე დღეს ბაზარზე დამკვიდრება ძალიან რთულია. თანამედროვე ქალი ძალიან გარკვეული და ინფორმირებულია. ის ლამის ფოტოებიდან ცნობს ქსოვილის ხარისხს. შეიძლება ერთხელ შეცდეს, იყიდოს, მაგრამ თუ სამოსი კომფორტული და ხარისიანი არ არის, მას მეორედ არასდროს შეიძენს.

პირველადი ამოცანა შესრულებულია – “სტუდიოლაინი” ძალიან მაღალი ხარისხის თანამედროვე მოდის მიმდევარი ბრენდია. როგორც მისი დამფუძნებელი ამბობს, ყველა მასალა წინასწარ უმკაცრეს კონტროლს გადის. დიდი ყურადღება ეთმობა ტანსაცმლისა და განსაკუთრებით, ფეხსაცმლის კომფორტულობას.

სიახლე ამ ფერად ბრენდთან დაკავშირებით კი ისაა, რომ ონლაინ სივრციდან ის უკვე მაღაზიებში ინაცვლებს. მომზადდა შემოდგომა-ზამთრის კოლექცია. ის თანამედროვე ქალისთვისაა, რომლის საქმიანობას ასაკი და სტატუსი არ ზღუდავს. ამ ქალებსა და გოგოებს “სტუდიოლაინმა” ერთი მნიშვნელოვანი პრობლემაც გადაუწყვიტა – საქმიანი კოსტიუმების ძალიან ფართო არჩევანი შესთავაზა სტილის, ტექსტურისა და ფერების მიხედვით. კოსტიუმების გვერდით ლამაზი კაბებია. თანაც, უნივერსალური – დღის მანძილზე პიჯაკზე მოირგებ საქმიანი შეხვედრებისთვის, ხოლო საღამოს – წვეულებებსა თუ პრეზენტაციებზეც გამოგადგებათ. აუცილებლად კარგად დაათვალიერეთ პალტოები, ტრენჩები და ფეხსაცმელები. აქ მთელი არსენალია მრავალფეროვანი სამუშაო კვირისა თუ უქმე დღეების დასაგეგმად. “სითის” საშემოდგომო ნომრისთვის “სტუდიოლაინის” ფოტოპროექტი მომზადდა. მისი პრეზენტაცია ოთხ საინტერესო ქალს ვანდეთ. ვიწყებთ სოფო სულაძით.

სოფო სულაძე – Studioline-ის დამფუძნებელი

მიუხედავად ოჯახისა და საინტერესო სამსახურისა, ყოველთვის მქონდა დაუკმაყოფილებლობის შეგრძნება. მინდოდა შემექმნა საკუთარი ხაზი. ამაზე ფიქრი ღრმა ბავშვობიდან დავიწყე. მიზნად დავისახე საკუთარი ტანსაცმლისა და ფეხსაცმლის ხაზის შექმნა. ვიცოდი დიდი შრომა და ენერგია დასჭირდებოდა ამ ყველაფერს. მიუხედავად ამისა, ძალიან რთულ, პანდემიის პერიოდში აქტიურად დავიწყე ბრენდის პლატფორმაზე მუშაობა. ეს დრო გამოვიყენე საქმის წამოსაწყებად.

Studioline ჩემთვის გაცილებით მეტია, ვიდრე ჰობი. მაქსიმალურად ვიხარჯები, რომ ჩემი ბავშვობისდროინდელი ოცნება და ჩანაფიქრი სისრულეში მოვიყვანო. ვმონაწილეობ თითოეული დეტალის შექმნაში. კოლექციას თავიდან ბოლომდე თვითონ ვქმნი. ვარჩევ ქსოვილებს, უშუალოდ ვარ ჩართული წარმოების ყველა ეტაპზე.

ბრენდი, რომელიც შევქმენი, მოდის ტენდენციებსა და ხარისხს აერთიანებს. Studioline ორიენტირებულია საქმიან და მიზანდასახულ ქალებზე, რომლებიც მუდმივად მიისწრაფვიან განვითრებისკენ. ვფიქრობ, Studioline იდეალური გადაწყვეტილებაა ელეგანტური, კომფორტული და საქმიანი ვიზუალის შესაქმნელად. ამ ეტაპზე იქმნება ქალის პრემიუმ კლასის ტანსაცმელი და ფეხსაცმელი, რომელიც შესანიშნავად შეესაბამება ნებისმიერი თანამედროვე “ბიზნეს ლედის” ყოველდღიურ გარდერობს. ჩემთვის ხარისხი ძალიან მნიშვნელოვანია. ფეხსაცმლის წარმოებას განსაკუთრებული ყურადღება ექცევა, რადგან დახვეწილ ვიზუალთან ერთად, ვფიქრობ, აუცილებელია იყოს პრაქტიკული. ბრენდი, რომელსაც ჩვენ გთავაზობთ, არის handmade და იწარმოება საქართველოში 100%-ით ნატურალური მასალისგან. ის აერთიანებს როგორც კლასიკურ, ასევე ყოველდღიურ მოდელებს.

ჩემი მიზანია Studioline საზოგადოებაში ასოცირდებოდეს ხარისხთან და სიმარტივესთან, რადგან ვთვლი, ქალის ბუნებრივ სილამაზეს ყველაზე მეტად სადა, დახვეწილი და ხარისხიანი სამოსი უსვამს ხაზს. მინდა ამ ბრენდის მეშვეობით ქალებმა თამამად გამოხატონ საკუთარი თავი, ემოციები და თავდაჯერებულად შეხვდნენ თანამედროვე სამყაროს გამოწვევებს.

ანი ფურცელაძე, CEO SC CAPITAL GROUP-ის აღმასრულებელი დირექტორი

ზოგადად, ქართველი დიზაინერების დიდი გულშემატკივარი და მომხმარებელი ვარ. განსაკუთრებით მიყვარს მათი წარმოჩენა საზღვარგარეთ. იქ ბრენდით ვერავის გააკვირვებ, ყველაფერი ხელმისაწვდომია. ჩემი საქმიანობიდან გამომდინარე, ხშირად მიწევს “დრეს კოდის” დაცვა და ჩემს საქმიან იმიჯზე ზრუნვა. ასე რომ, საქმიან გარემოში სტილიც შეზღუდული მაქვს და ფერების არჩევანიც. “სტუდიოლაინის” დახვეწილი და ლამაზი ტანისამოსი მაძლევს საშუალებას გამოვიყურებოდე ტრენდულად და ელეგანტურად. მინდა მეტად გაგვანებივროს მისი მომხმარებლები ლამაზი და კომფორტული ტანისამოსით თუ ფეხსაცმლით, რომელიც საქმიან შეხვედრებსა თუ მეგობრულ გარემოში თავდაჯერებულობას შეგვმატებს.

თეონა თავართქილაძე, BEAUTY AND THE BOX დამფუძნებელი

ტანსაცმლის არჩევისას ჩემთვის ერთნაირად მნიშვნელოვანია ვიზუალი, ხარისხი და კომფორტი. ამ ყველაფერს, ვფიქრობ, ბრენდი, რომელსაც Studioline – ჰქვია, აერთიანებს. რაც მთავარია, არის ქართული, თანამედროვე და კლასიკური. ბევრი წარმატება მინდა ვუსურვო სოფოს. ასევე, ვუსურვებ ჩემსავით კმაყოფილ ბევრ მომხმარებელს.

ლიკა კვარაცხელია, ტელეწამყვანი

მიუხედავად იმისა, რომ ბრენდი ახალია, ძალიან ხარისხიანი და გემოვნებიანია როგორც შესრულება, ასევე ქსოვილები. მისი ლამაზი ფერებითა და სისადავით ნამდვილად მოხიბლული ვარ. STUDIOLINE-ს ბევრ მომხმარებელსა და წარმატებას ვუსურვებ.

ბრენდის შესაძენად შეგიძლიათ ეწვიოთ DRESSUP-ჯგუფის მულტიბრენდულ მაღაზიებს.

JEANS GALLERY /FACTORY “მერანი” – რუსთაველის გამზ. 42

FACTORY – “თბილისი მოლი” მეორე სართული – დ. აღმაშენებლის ხეივანი – მე-16კმ.

ასევე, ბრენდი გთავაზობთ ონლაინ მომსახურებას. ყიდვის შემთხვევაში გამოიყენებთ უფასო მიტანის სერვისს მთელი საქართველოს მასშტაბით.

dressup.ge/en

ავტორი: ქეთა მიქელაძე

ვიზაჟი: ნინო მარტაშვილი

გადაღების ადგილი: სასტუმრო “თბილისი”

The post Studioline – ახალი ბრენდი “სითიში” appeared first on City Magazine.